Co obxectivo de achegar ao alumnado da facultade os proxectos e traxectorias de diferentes egresados e egresadas, Belas Artes impulsou no ano 2021 a serie de publicacións En tránsito, que na súa nova entrega presenta as entrevistas a sete artistas formados no centro, coa revisión da idea de territorio como fío condutor. Vicente Blanco, Lara e Noa Castro, Andrea Davila, Manuel Mata, Ventura A. Pérez e Carla Souto abordan neste volume os seus intereses e procesos de investigación e creación, así como o que supuxo para elas e eles o seu paso por Belas Artes, nas entrevistas realizadas pola xestora cultura e tamén egresada da facultade Sara Donoso.
Editada polo selo de autoedicións Error es Bien, Lo que somos é o título desta nova entrega dunha serie que conta en cada número coa colaboración dun ou dunha docente para a selección das e dos protagonistas do volume e do seu fío condutor. Desta volta, foi a artista e profesora Chelo Matesanz quen participou na escolla de “creadores e creadoras que propoñen cos seus traballos unha revisión da idea do territorio, desde a ruptura dos patróns establecidos para elaborar un discurso independente, moitas veces irónico e valente”, sinala Donoso. “As diferentes entrevistas amosan como a contorna, a memoria, as paisaxes, o rural ou o propio contexto galego aparecen nas prácticas das e dos artistas desde aproximacións moi diversas”, engade a coordinadora dunha publicación editada en galego e castelán e na que o deseño e maquetación correu a cargo de Sara González, responsable tamén da súa impresión en risografía xunto con Marcos Covelo.